رفعت عينيها المبللتين إليه، وأخذت نفسًا متقطعًا قبل أن ترد بصوت مبحوح:
أنا زعلانة... حاجات كتير جوايا مش قادرة أحكيها.
عقد خليل حاجبيه بشفقة وقلق، وأمسك بيديها برفق:
حاجات زي إيه يا جنات؟ احكيلي، يمكن نلاقي حل مع بعض.

هزّت رأسها وكأنها تحاول الهروب من الحديث، ثم قالت بصوت بالكاد يُسمع:
مش عارفة لية حاسة بشئ بيضغط على قلبي قلق على فايا كمان تاج
الإتنين معرفش ليه حياتهم مضغوطة دايمًا
تاج لتالت مرة جوازها بيفشل، صحيح الجوازتين الاولانين كنا عارفين إنهم غصب عنها ومكنش لهم أي مشاعر حقيقية ، بس بالنهاية محسوبين عليها، أنا لما إتجوزت جاسر فكرت إن فرصتها فى السعادة رجعت لها بس كنت غلطانة، تاج بتداري فى قلبها وقدامنا، جوازها من جاسر فى لحظة ممكن ينتهي.

إستغرب خليل ذلك قائلًا:
أنا متأكد إن جاسر بيحب تاج.

تنهدت بغصة قوية قائلة:
كان نفسي أكد ده فعلًا، بس انا سمعت جاسر وهو بيتهم تاج انها اتعمدت تجهض نفسها، بدل ما يحتويها، تاج مخبية وجعها فى قلبها، ومتأكدة مش هتتحمل كتير وهتنفجر، وجاسر للأسف بيضغط على تاج ومش حاسس إنه بيخسرها، كفاية نظرات الكُره اللى بشوفها من هالة ومامته لـ تاج كانت الشماتة واضحه على وشوشهم، هالة منسيتش الحادثة القديمة وجاسر للأسف بيحقق لها هدف الإنتقام إنه يدمر قلب تاج.

❈-❈-❈
جريمة مروعة
قتيل مطعون بشقة مفروشة ولا يوجد أي أدلة على هاوية القاتل...وبحث جنائي مُكثف بالشقة عن دليل واحد لمقتل ذلك الشاب نجل أحد رجال السياسة سابقًا، وتحفُظ على ذلك الحاسوب الخاص به، ربما يجدوا دليلًا.❈-❈-❈
بنفس الوقت

توقفت فايا بدراجتها النارية فوق ربوة عالية بمكان قريب من المزرعة، ترجلت من على الدراجة تقف اسفل الأمطار الغزيرة تنظر الى تلك القُفازات التى بيديها والأمطار تسيل عليها، تزيح تلك الدماء، بلحظة كانت تصرُخ بقوة قبل أن تشعر بيد توضع فوق أحد كتفيها.«يتبع»
للحكاية بقية.

﷽
#سهم_الهوى" امرأة الجاسر"
السهم الخامس والعشرون "الأخيرة1"
🏹🏹🏹
بـ شقة صهيب
وضعت تلك الصنية وجلست على مقعد مقابل له قائلة:
مش قولت إن فى مشاكل فى المشروع بتاع مرسي مطروح أمال إنت بتصمم إيه دلوقتي.

زفر صهيب نفسه بضيق أجابها بنبرة يشوبها بعض إحباط.:
للآسف فعلًا عليه مشاكل كتير من بدايته كنت حاطط أملي تنفيذ المشروع ده يرفع إسم المكتب الهندسي بتاعي، من أوله مشاكل.

نهضت من مكانها وجذبت المقعد جلست جواره تُربت على كتفه بأمومة قائلة:
ان شاء الله المشاكل تتحل وإسم مكتبك هيبقي له صدى كبير إن شاء الله، وبعدين إنت مضايق ليه مش يمكن خير، أهو عرفت من مرات أخوك إن أهلها راجعين بعد بكره، أهو نكلمهم ونحدد ميعاد الخطوبة.

نظر لها صهيب مُتهكمً يقول:
وإنتِ عندك ثقة أوي أنهم هيوافقوا.
ابتسمت بثقة تحمل في طياتها مزيجاً من الإصرار والتفاؤل قائلة بحسم:
أكيد هيوافقوا. ده هما يتمنوا إنت مش شايف نفسك،إنت صهيب جنيد، المهندس الطموح، اللي هيعمل اسم كبير في السوق. مين مش هيتمناه لابنته؟"