دريه: ماعلش يابنتى بس انتى مهما ان كان اصبرى عليه حتى عشان خاطر ولادك
دا انتى بسم الله ماشاء الله عندك بنت عروسه على وش جواز وابنك ما شاء الله عليه بكره هما يعوضوكى وتفرحى بولادهم

ابتسمت نهى رغما عنها ثم قالت : خالتو انا ممكن اطلب منك طلب
دريه : ياسلام يانهى دا انت تؤمرى ياحبيبتى عنيا
نهى: ربنا ينورهملك يا رب انا بس كنت عايزه خدمه من عصام ممكن تتوسطيلي عنده

دريه : اووى اووى هوا انا عندى اغلى منك دا الدم عمره مايبقى مايه اول عصام مايرجع من السفر بكره ان شاء الله هخليه يكلمك
نهى: ربنا يجيبه بالسلامه يارب بس خليه يتصل بيا فى الوقت ده كده عشان انتى عارفه ...

دريه : عارفه عارفه ......رؤوف مش كده بس يا نهى اسمعيها منى كلمه طالما لسه بيغير يبقى لسه بيحب
ابتسمت نهى بسخريه : لا يا خالتو مش حب حب ده حب تملك
دريه : يا عبيطه حب تملك حب بالصلصه المهم انه حب
ضحكت نهى : هههههههه ااه يا خالتو ضحكتينى وانا ماليش نفس

انهت نهى زيارتها لخالتها وودعتها مع وعد بلقاء قريب
دريه : ابقى كرريها بالله عليكى يانهى اديكى شيفانى قاعده لوحدى على طول
قالت نهى بتأثر : خلاص يبقى ده ميعادنا من كل اسبوع زى النهارده اتفقنا
دريه : اتفقنا وانا هستناكى

عادت نهى الى منزلها قبيل عوده ابناءها بقليل تناولو طعام الغداء بمفردهم فيما جلست نهى تتابع مايدور فى العالم على شبكه الانترنت
وجدت دعايه لكتب تنميه بشريه وايضا دعوه لحضور ندوه فى احد مراكز العلاج النفسى والمشاكل الاسريه بعنوان ازمه منتصف العمر عند الزوجين

دونت نهى اسم المركز وميعاد الندوه وايضا بعض اسماء الكتب التى جذبت اهتمامها وقررت النزول لشراءها فى اقرب وقت
عاد رؤوف ووجد زوجته جالسه ومشغوله عنه مما اثار استيائه
رؤوف : السلام عليكم
اغلقت نهى جهاز اللاب توب وقالت : وعليكم السلام ورحمه الله وبركاته

قال رؤوف بشك : وجايه على نفسك ليه ما كنتى تكملى
نهى: لا عادى ابقى اكمل بعدين تتغدى ؟
رؤوف : فيه ايه اكل
تعجبت نهى لسؤاله : مكرونه وفراخ مشويه
رؤوف : لاء مش عايز اكل فراخ
نهى: امال عايز تاكل ايه ؟
رؤوف: اى حاجه تانيه شوفى حاجه تانيه
نهى: اعملك بفتيك بدال الفراخ

رؤوف : لاء عايز كشرى مصرى
نهى: كشرى !!!!! ايوه يا رؤوف بس ده هياخد وقت
قال رؤوف بتصميم : مش مستعجل على مهلك
انا هنام ولما تعمليه صحينى
نهى: طيب امرك
انصرفت نهى الى اعداد الكشرى عندها اغلق رؤوف الباب بسرعه واتجه الى جهاز اللاب توب وفتحه واخذ يفتش فيه عله يجد ما يريح الشك الذى تصاعد بداخله

فكان رؤوف مقتنعا ان هناك شخصا ما دخل مؤخرا حياه زوجته هذا ما غيرها وعندما قالت له نهى "اجرب حظى مع غيرك" زاد هذا من شكوكه
شرعت نهى فى اعداد مكونات الكشرى وفؤجئت انها لا يوجد فى مطبخها ما يكفى من العدس لصنعه