رؤوف : ااه ياستى رجع تانى وكسبها
اللى هيجننى انها نفس المواصفات اللى كنت داخل بيها بس بسعر ااقل 3%
نهى: غريبه فعلا مش ممكن يكون حد بيتجسس عليك؟
رؤوف : حد حد زى مين؟ وبعدين الموظفين اللى عندى معايا من زمان
نهى: انت ماعينتش حد جديد فى المكتب الفتره اللى فاتت

رؤوف : لاء كل المهندسين والمحاسبين اللى معايا هما هما
نهى: امال مين اللى شوفتها فى الحفله اللى قالتلى الباشمهندس مش بيبطل كلام عنك
تردد رؤوف : دى دى دى شيرى
شيرى بتاعه العلاقات العامه
نهى: طيب مش دى جديده؟؟؟

رؤوف : لا حرام عليكى دى غلبانه وبعدين دى علاقات عامه ايه اللى يفهمها فى المناقصات والشغل الفنى ده
نهى: اى حد يقدر يستخدم مكنه التصوير ياخد الورق اللى خاص بالمناقصات ويصوره مش لازم يكون حد بيفهم فى الفنيات بتاعه الشغل يارؤوف

نظر لها رؤوف غير مصدق وشعر انه تلقى ضربه على رأسه
رؤوف: قصدك ايه قصدك ان هيا اللى بتنقل الورق لوليد المنجى لا ياشيخه استحاله شيري تعمل كده

نهى : نعم؟؟؟!!! استحاله شيري تعمل كده؟ ليه ان شاء الله وبعدين تعالى هنا ايه اللى بينك وبينها يخليك واثق اووى كده ويخليك تتكلم عنى معاها وتحكلها عنى ؟؟؟

رؤوف : جرى ايه يانهى عادى يعنى موظفه عندى والكلام بيجيب بعضه وبعدين دى كانت مجامله منها وكفايه اصلا انك اتصرفتى معاها بقله زوق دى مدتلك ايدها تسلم عليكى وانتى تجاهلتيها
نهى : بصراحه شكلها معجبنيش واحده شكلها بيئه ولوكال وايه اللى كانت لابساه ده ده لبس واحده محترمه شكل ايمن هوه اللى معينها ماهى الاشكال اللى بيعرفها بتكون كده

احمر وجهه رؤوف بشده وقال : نهى من فضلك كفايه كلام لحد كده لانك بتغلطى فى ناس كتير اووى دلوقتى خلصتى شيري واتدورتى على ايمن

امسكت نهى بكتف رؤوف واقتربت منه : يا رؤوف يارؤوف انا قصدى افتحلك عينك وتشوف اللى واضح قدامك زى عين الشمس ماسألتش روحك منين وليد يجيب نفس مواصفاتك ويقدمها هه؟لازم يكون حد عنده القابليه والقدره انه يدخل مكتبك ويدور فيه ويديه للى اسمه وليد ده

فكر رؤوف ان نهى محقه ولكن ليس شيري مستحيل فهى زوجته اولا واخيرا ومكسبه يصب فى صالحها وهو لا يمنع شىء عنها
رؤوف : طيب طيب سيبك من الموضوع ده دلوقتى وتعالى نخرج انا محتاج اغير جو
طبعت نهى قبله على خده واحتضنته وهى تدعو الله سرا ان يهديه

فى اليوم التالى دخلت شيري مكتب رؤوف وهى غاضبه للغايه لاحظ رؤوف غضبها
رؤوف : مال الجميل ؟ زعلان ليه؟
شيري : نعم!!! حضرتك بتستهبل انا رنيتلك امبارح اكتر من مره ومارديتش عليا وقفلت موبايلك ومن ساعتها ما اعرفش عنك حاجه انا عايزه اعرف انا هفضل كده لحد امتى ان شاء الله