ادهم ببتسامه : متقلقيش انا كويس مدام شيلتك مش هنزلك غير في الشقه ان شاء الله " وفعلا شالها وطلع بيها لحد باب الشقه نزلها وفتح الباب ودخل وبصلها ببتسامه " نورتي الشقه يا نهال
نهال ابتسمت بتوتر ودخلت : منوره بيك " بصت علي الشقه كانت جميله عكس توقعاتها واسعه وفرشها حلو قالت بإعجاب " الشقه جميله اووي
ادهم قفل الباب وابتسم : رسمتها في بالي والحمدالله طلعت احسن من اللي في بالي واكتر " ومد ايده ليها ف مسكتها بتوتر " تعالي معايا عايز اتكلم معاكي كلمتين " واخدها وراحو قعدو في الصالون "
ادهم بهدوء وهو باصص عليها : ممكن تحكيلي مالك ؟
نهال ابتسمت بتوتر واضح : انا الحمدالله كويسه مفيش اي حاجه بالعكس الفرح كان جميل وجايا مبسوطه
ادهم مسك ايدها برقه : انا حاسس انا متوتره ديما وخايفه وقلقانه ليه بقا ايه السبب احكي كل اللي جواكي بدون كسوف او خجل انا جوزك يعني المرايا بتاعتك كل اللي عايزه تقوليه قوليه انا سامعك
نهال بصتله وحست انها عايزه تتكلم فعلا ف اتكلمت بتلقائيه : صدقني انا بحاول اتعامل عادي بس انا خايفه اوي ادهم انا مبعرفش اطبخ مبعرفش اغسل الهدوم حجات كتير في شغل البيت مبعرفش اعملها انا مش اجتماعيه خالص مبحبش اقعد مع حد معنديش صحاب مامتي هي اللي كانت صحبتي الوحيده اللي كنت بشكيله كل اللي انا حاسه بيه وانا متأكده ان عندها حل فاهمني
ادهم بهدوء وهو لسه ماسك ايدها : فاهمك كملي سامعك كل اللي انتي عايزه تقوليه قوليه
نهال بتوتر شديد : وفوق كل دا معرفش اي حاجه عن الحياه الزوجيه معنديش صحاب علشان اتكلم معاهم وافهم ومحاولتش اتكلم مع مامتي ف انا في نظر نفسي فاشله في كل حاجه
ادهم ابتسم وحط ايده علي دقنها خلاها تبصله : كل العيوب اللي انتي شيفاها في نفسك دي عجباني وراضي بيها " وقال بحنان " انا معاكي هعلمك كل حاجه انا فيا حجات كتير ناقصه بس كامله عندك وانتي كذالك ف احنا هنكمل بعض طول ما انا موجود مش عايزك تقلقي ولا تخافي من حاجه قبل ما اكون جوزك هكون صاحبك اللي ديما مستعد انه يسمعك وعمري ما هَمل بالعكس هستني الوقت اللي تشكيلي فيه .
.. اتفقنا ؟
" نهال ابتسمت هو ازاي قدر يريح بالها بشكل دا ، قدر يحتوي خوفها وقلقها وطمنها "
ادهم قام وقف ببتسامه خفيفه : دلوقتي الشقه قدامك اتفرجي عليها براحتك ولو حبيتي تغيري هدومك اوضة النوم فيها حمام وانا هدخل الحمام اللي هنا تمام
نهال : تمام انا هدخل اغير هدومي علشان الفستان تقيل " وراحت علي اوضة النوم فتحت بابها ، عفش رقيق هادي الوانها مريحه السراحه بسيطه مش مكركبه كل حاجه حلوه فيها "
" نهال اول حاجه فتحت الدولاب تشوف ترتيب امها وابتسمت لما شافتهم متنظمين زي ما هي طلبت ، قفلت الدولاب وقعدت علي السرير "
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.