سالى :لا ابدا كنت زهقانه ونزلت أتفرج وجهت كلامها للصايغ طب أنا هروح دلوقتي على ما الحاجه تيجي من المحل الثاني
شخص ١:مافيش داعي يا مدام الحاجه جت
سالى واقفه تفرك ايدها ومش عارفة تتصرف أميرة قربت عليها وقالت لها :باقي الشبكه معاكي ولا فالبيت

سالى:فالبيت بس انتى هتعملى فيا إيه
أميرة :ولا حاجه
أحمد :هنبلغ البوليس يا حلوة
سالى بترجى :لأ ارجوكم بوليس لأ.. وفتحت شنطتها وطلعت علبه الدهب خدي باقى الشبكه اهى وسامحيني ولو عايزانى امشي من الشقه كمان همشي
أميرة خدت الدهب :خلاص يا بشمهندس متتصلش ب البوليس اهى عرفت غلطها

الصايغ:بس هى سرقتك لازم نعمل محضر
أميرة :لا معلش أصلها حامل ومش هتقدر عالبهدله حسابها عند ربنا.. وخرجت هى وأحمد
أحمد :أنتى ازاى تسيبها كده من غير عقاب
أميرة :عقاب ربنا أقوى من اى عقاب يلا عشان اتاخرنا ومحدش يعرف احنا فين.

. ركبت العربية
أحمد :احممم كنت عايز أسألك انتي قولتلى لاخوكى إنك رجعتي لمصطفي عشان حياته متتخريبش ممكن أعرف ازاى لو مش هتزعلى
أميرة ابتسمت بوجع:أنا بشتغل من قبل الجواز من البيت عشان وليد كان رافض فكرة الشغل واتجوزت مصطفى جواز تقليدى شافنى فى فرح صاحبتى اللى هى قريبته وجيه أتقدم وليد شاف إنه مناسب وناس سيرتها كويسه ومن الخطوبه بيعاملنى أميرة زى ماكان بيقول ولما جيت اختار الشبكه عملتها عموله كل قطعه فيها مميزه يعني الخاتم مكتوب عليه أسمى والاسورة أسمى جنب إسمه وكدا يعني والصراحه معترضش واتجوزنا وبعد ٦شهور أهمل شغله وبقى يغيب كتير وانا اللي بصرف عالبيت ولما اعترضت ضربني وبهدلنى ووقفت عالطلاق ورحت بيت اهلي سمعت نهى بتتخانق مع وليد عشان قعدتى ديه وهى مش واخدة راحتها هى عروسه جديده اخويا قالها لو مش عجبك امشي أنا مش هطرد اختى من بيت أهلهااومستحيل تعيش لوحدها ولانى عارفه انه بيحبها كان الاختيار صعب بس هو اختارنى فقررت اتصل بمصطفى واقوله انى موافقه ارجعله ورجعت

أحمد :وفضلتى تصرفي عالبيت
اميرة:ايوة أصرف وآكل البيت كله كل يوم يعتبر ببلاش اهو بدل ما اخرب حياة اخويا اللى رباني وكبرنى بعد اهلي
أحمد :أنتى ازاى قبلتى كده وجينا إحنا كمان كملنا عليكي
أميره :لأ لأ طبعاً دينا الوحيده فى العيله دى اللى كانت بتعاملنى اخت بجد مش نفاق الوحيده اللي ما خبتش ولادها منى لما عرفت انى مبخلفش وكانت ديما داعم ليا اللي بعمله ده قليل على هى حسستني بيه ارجوك متندمنيش انى حكيت ومسحت دمعه هربت من عنيها

أحمد لسه هيتكلم قاطعه الفون
أحمد :ايوة يا ماما إحنا خلاص اهو قربنا عالبيت.... ايه أمتى ده حصل أنا جاي اهو

الفصل الثامن

فى منزل والد نهى رايحه جايه هتتجنن إزاى وليد مش بيرد عليها هى بالذات
والدها:يا بنتى يمكن كان عنده شغل معرفش يكلمك
نهى:يا بابا ده رد عليك وعليا لأ
والدها:يا بنتى اهدي مش كده
نهى :أنا هكلم ست أميرة أكيد عارفه فى ايه من يوم مكلمنى وهو عندها وهو متغير معايا.